سيبها تحبك ,,تحبها تسيبك

القصة طويلة شوية ,,بأسلوب عامي سهل ,,ان شاء الله تعجبكم و تندمجوا فيها
اسم الشاب الأمور بتاعنا (حامو) الميم مشدده زي كلمة (عمو) :))
قراءة ممتعة
---------------------


في سكون أوساط ليل معتدل ,, يتخلله أصوات بومة خافته

ركضت أم حامو مسرعة ناحية باب الشقة , بعد سماعها فرقعة خبطة الباب في العتبة

أم حامو : لاقيتلك حتت دين عروسة
حامو : وحشه..
أم حامو : مش تعرف هي مين الأول!!
حامو : عارفها وحشه ,, بنت عم صبحي الي أدامنا
أم حامو : و عرفت منين
حامو : ماكنش فاضل غيرها
أم حامو : يا ابني استهدي بالله كدا و أعد معاها و شوفها
حامو : يا ماما قولتلك مليون مره لازم يكون في قبول
أم حامو : خليك قاعد كدا ,,كل اقاربك اتجوزوا و خلفوا و انت قاعد زي ما انت ,,و ياك عالله اسمعك بتقول عايز أتجوز
حامو : أنااا هتجوز مرره واااحده ,,مش هتجوز واحده و آآخد فيها مقلب ,,افهميها بقى
أم حامو : مقلب!! ,, تصدق بالله ,,الي هتتجوزك هي الي هتاخد فيك مقلب
حامو : إن شاء الله
أم حامو : لو كنت عاقل شوية كنت عرفت ان الجواز مش شكل ,, و بنت موزه بتتجوزها زي ما بتصيع كدا
حامو : ممكن أنام؟
أم حامو : أنا غلطانه اني كلمتك اصلا ,,روح روح روح
حامو : رايح أنام مش عايز ازعاج

الساعة التاسعة صباحا

الموبايل يرن في أوضة الواد حامو
حامو : أيوه يا زفت
كيمو : ايوه يا زباله ,,يلا قوم ياض الأوتوبيس هيمشي بعد ربع ساعة
حامو : طيب هضرب الجيل و جاي

كيمو : استنى يا اسطى أهو وصل
سواق الأوتوبيس : و الله ما ينفع كدا و اتأخرنا نص ساعة
كيمو : معلش اصله شخصية مهمة ,, ما تجري ياااض يااا حامو و خلي عندك دم
حامو : ياخويا متسعجلين على ايه ,
كيمو : أوعه تكون ما جبتش السجاير
حامو : أمال أنا ايه الي أخرني يا أهبل
كيمو : حبيبي يا حامو ,,تعالى يلا حاجزلك مكانا ورا عشان ننقي براحتنا ,,بالراحة يا اسطى بس نوصل للكرسي

حامو و كيمو على الكرسي الي ورا
حامو : ولا ,,الدفعة دي شكلها يسد النفس
كيمو : أمال الواد اشرف كان بيقولي دي كلها موزز
حامو : اشرف دا غبي اصلا ,,لو كنت أعرف كنت كملتها نوم
كيمو : ياعم أهي فوسحة ,,هتفرج ان شاء الله

حامو : و لا ,,البت الي قدام خالص دي تبع مين؟
كيمو : مش عارف ,, بس شكلها خام
حامو : شوفلك غيرها خلاص حجزتها
كيمو : دي عيد ميلادها النهارده
حامو : هي تبعك ياض و لا ايه؟
كيمو : يا أهبل بقولك معرفهاش
حامو : أمال عرفت منين
كيمو : كل الي كان بيدخل كان بيباركلها ,,
حامو : فضيلي علبة السجاير
كيمو : ليه؟
حامو : فضيهالي بس ,,عندك قلم؟
كيمو : آه
حامو : هات ,, كل ,,ســـنــة ,,حد يجيب قلم برتقاني يا أهبل
كيمو : دا هو دا قلم التظبيط
حامو : و إنـــتي ,,طــيـبة ,,عـــقـــبــال ,,,,,سنة
خد ياض قلمك ,,لما نقرب عالحاودة الي جايه قولي
كيمو : ماهي قدامنا أهي
حامو : يادوبك ألحق

حامو يقفز من مقعده متجها لمقدمة الأوتوبيس و عندما اقترب من مقعد الفتاة
اتجه الأوتوبيس لليمين ,,فمال حامو عليها بسبب ظاهرة القصور الذاتي ,,و
سقطت منه علبة السجائر على حجرها

حامو : هو لسه كتير يا اسطى
الأوسطى : وصلنا خلاص
حامو : طيب

و يعود حامو لمقعده الخلفي
كيمو : يا ابن اللذينه دي فتحتها و بصت عليك و انت راجع و ضحكت
حامو : ضحكت جامد و لا نص نص
كيمو : ماكنتش شايف عدل منك ,,مش قولتلك البرتقاني بيظبط
حامو : ماشي يا سيدي

وصلت الحافلة أو الأوتوبيس اخيرا للمنتجع

و بعد نصف ساعة جلس كيمو و حامو في كافيه
حامو : هي راحت فين يا ابني
كيمو : طب أعملك ايه طيب تاهت منك ,,يادوبك مركز في بتاعتي
حامو : شيت عليك ,,مش لاقيها ياعم
كيمو : ما تخدلك لفة يمكن تلاقيها
حامو : آه يا كلب بتوزعني
كيمو : يلا يا حامو اخلع بقى
حامو : ماشي ياض

تليفون حامو بيرن
حامو : رقم غريب ,,يارب تكون هي
المتصل : ألووو
حامو : مين الحلو الي معايا
المتصل : ههههه يعني مش عارف مين
حامو : لأ و الله مش واخد بالي
المتصل : انت حامو صح
حامو : و عرفتي اسمي ازاي بقى
المتصل : سامعه صاحبك بيقول يا حامو يا حامو يا حامو
حامو : لاتكوني سمعتي الحوارات كلها
المتصل : الشتايم ؟ لا ما تخافش مش بسمعها
حامو : اسمك ايه بقى؟
المتصل : نانسي
حامو : صحيح عرفتي رقمي ازاي
نانسي : هههههه و الله ؟
حامو : اصلي مش بديه لحد
نانسي : احنا هنقضيها كدا و لا ايه ,, ما تيجي أنا قاعده جوا
حامو : طيب جاي أهو

حامو دخل جوا يدور عليها

حامو : فينك يا شيخه بدور عليكي
نانسي : خد الورقة بتاعتك,, نسيتها في علبة السجاير
[ندعوك للتسجيل في المنتدى أو التعريف بنفسك لمعاينة هذه الصورة]


حامو : و أنا بقول عرفت رقمي منين
نانسي : بس قديمه أوي على فكرة
حامو : و أنا كنت هجيبك ازاي
نانسي : كلمني ,,هو عيب تكلمني
حامو : لأ بس اصلنا كنا مفكرينك خام
نانسي : ايه؟
حامو : لا و لا حاجه ,,كنا مفكرينك هترفضي يعني
نانسي : و ارفض ليه ,,دا انت حتى موز أهو
حامو : دا انتي داخله جامد ,,شكلي هتعب كتير النهارده
نانسي : ههههههههه
نانسي : أنا أول مره اشوفك ,,انت دفعتنا؟
حامو : هو في الحقيقة أنا متخرج من تلت سنين
نانسي : ما أنا برضو بقول الواد الموز دا مش معانا في الدفعة
حامو : بس عارفه ,,دفعتكم دي زي القمر ,,قمامير كلهم ما شاء الله
نانسي : و الله ؟ ,,أنا كنت سمعاك بتقول دفعة تسد النفس
حامو : انتي كنتي حاطه ودنك معانا بقى
نانسي : ههههه ابقى وطي صوتك يا خويا
حامو : بس انتي ما سمعتيش كويس ,,كنت بقول تسد النفس ماعدا الي قاعد أدام
نانسي : ماله الي قاعد أدام ؟
حامو : زي القمر
نانسي : بس بقى عشان بتكسف
حامو : و ماسك دريكسيون و بيلف
نانسي و هي بتضرب حامو على كتفه : ههههه بس يلا
حامو : تعالي نطلع الكافيه برا عند صاحبي ,,أهو حتى أتمنظر أدامه شوية بيكي
نانسي : ماشي يلا

و هما بيتمشوا
نانسي : و لا قولي صحيح ,,يعني انت مخلص من تلت سنين و كل سنة بتطلع الرحلة ؟
حامو : اه أهي فسحه ببلاش ,,
نانسي : فسحة ببلاش و لا فسحة تظبيط برضو
حامو : لا لا ,,دماغك ما تروحش لبعيد ,, أنا اصلي عندي صحاب كتير و كدا و بعز الكلية أوي ,,فيعني بحب اطلع في الرحلات
نانسي : ماشي يا عم هعمل اني عبيطه و اصدقك
حامو : لسه هتعملي!!
نانسي و هي بتضرب كتفه : بس بقى
حامو : آآآه يا بت اللذينه اديكي تقيله ,,, و لا يا كيمو
كيمو : ياسيدي ياسيدي ماشيه معاك
حامو : بس لحسن آجي آخد الي في ايدك دلوقتي
كيمو : ماشي ياعم ,, تعالى الأول عرفنا
حامو : دا كيمو ,,أكيد عارفه
نانسي : هههه آه سمعت
حامو : دي نانسي
كيمو : تشرفنا ,,دا حامو و دي محاسن
حامو : محاسن!!
محاسن : تشرفنا يا حامو
حامو : لا لا ,, الشرف ليه طبعا
طيب خليكم قاعدين أنا هاخد الترابيزه الي هناك ,, يلا يا نانسي

حامو و نانسي على الترابيظه :)
نانسي : انت مافيش بنت موزه ماليه عينك كل افترة الي فاتت دي
حامو : ازاي
نانسي : يعني عايش بقالك كتير و مش متجوز و مش مرتبط
حامو : دي قسمة و نصيب ,,و كمان لازم قبول
نانسي : ماشي بس أكيد اي بنت تتمناك
حامو : انتي مافيش حد في حياتك؟
نانسي : أنا اساسن ما بكلمش ولاد
حامو : عارفه بقى لو كنت شوفتك من زمان ,,كنت خطبتك
نانسي بابتسامة واحد متر : و مين قالك اني هقبلك
حامو : كنت هعرض عليكي وافقتي وافقتي مش وافقتي هشوف غيرك
نانسي و هي بتضربه على كتفه : يا سلااام
حامو : آآآآه يا بت خفي ايدك شوية ,,دراعي ورمت و الله
نانسي : ما تجمد ياض ,,بس ايه هتشوف غيري دي ,,انت هتلاقي واحده كدا زي؟
حامو : ايوه بقى ادلعي
نانسي : و الله ,,طيب
حامو : طيب ايه ,,,ليه البوز دا طيب ,,أكيد مش هلاقي طبعا حد بحلاوتك كدا
دا انتي تسحري بلد
نانسي و هي مبسوطة : بتحب تامر حسني؟
حامو : تامر حسني ,,
نانسي : آه ,,مش عارفه؟
حامو : آه ماله تامر حسني ,, الي بيفتح قميصه دا
نانسي : هو ايه الي ماله بقولك بتحبه؟
حامو : انتي بتحبيه ؟
نانسي : طبعا يا ابني
حامو : آه و أنا كمان
نانسي : بتحب ايه أكتر أغنية له؟
حامو : هما كلهم حلوين ,,عارفه في مثلا ,, ممم في الحلوة كيداهم ,,البرنس حماده
نانسي : مين البرنس حماده!!
حامو : مش عارف بس بشوفهم عالتوكتوك ,,قصدي بوسترات في الشارع
نانسي : شارع!!
حامو : سيبك انتي ,,اصل أنا بصراحه ماليش في الأغاني و كدا
نانسي و هي زعلانه شوية : أنا بحب الموضه جدا
حامو : حقيقي
نانسي : أنا كل اسبوع بعمل شوبنج و بشتري هدوم كتير ,,حتى بابي و مامي بيزعقولي
حامو : ياااه حقيقي؟
نانسي : آه من كتر الهدوم الدولاب مليان ,,حتى بحط هدومي في دولاب بابي ههههه
حامو و هو مخنوق : ريلي ,,بتحطي هدومك في دولاب بابي
نانسي : ههههههه آه تخيل
حامو : أنا أعرف الي دولابه بيتملى بيحط في دولاب مامي مش بابي
نانسي : اتلم
و تضربه على كتفه و حامو يقع من عالكرسي
حامو : الله يخربيتك قولتلك ايدك تقيله ,,ايدك تقيله
نانسي : ما انت بترخم عليه
حامو : تقومي ضرباني كدا ,,تؤ ,,هففف
نانسي : خلاص أنا آسفة ,,بس اصلي مش بحب حد يتريق عليه

بعد ست ساعات
تصعد نانسي و حامو إلى الحافلة للعودة إلي البيت بعد انتهاء الرحلة
نانسي : تعالي أعدي جنبي هنا يا بيضة
حامو : لا أنا هعد ورا
نانسي : ايه دا !! يعني مش عايز تعد جنبي ؟
حامو: عايز بس اصلي متعود أعد ورا ,,ما تيجي معانا
نانسي : لا خلاص روح

حامو ينظر إلى نانسي و هي زعلانة ,, و ينظر إلى كيمو في الخلف و هو بيضحك مع زملائه و في يده سجائر ,,و يشتاق لقاعدة الشباب الدماغ

حامو يجلس بجانب نانسي : و حد برضو يسيب القمر دا و يعد مع الشلة الفسدانة الي ورا دي
نانسي : و الله
حامو : أنا بس كنت عايز اقول لكيمو كلمة سر كدا
نانسي : كلمة ايه ؟
حامو : حاجه كدا بيني و بينه
المهم يا بت مش تزعلي
نانسي : لو عايز تروح ورا روح أنا مش هخصبك على حاجه
حامو : لا أنا قاعد بإرادتي و حد يطول
نانسي و هي مبتسمة : لأ مش تطول

بعد اسبوع

حامو و كيمو في محل البلايستيشن
تليفون حامو بيرن
حامو : إلعن ابو شكلك مش رادد
كيمو : ايه ياعم ما ترد ,,تالت مره ما تردش
حامو : ياعم دي بت خنقة
كيمو : مين ,,نانسي ؟ ههههههههه ياعم البت دايبه فيك
حامو : بس مش كدا يا أخي ,,ضحكنا و هزرنا خلاص بقى ,,عايزه ايه تاني

عارفه يا كيمو دي بتتصل بيه مليون مره في اليوم و أنا في الشارع
,,بحاول أوزعها و بقولها لما أروح البيت كلميني يادوبك أول ما رجليه تعدي
عتبة البيت تلاقيها بتتصل ,,لا بلحق أعد مع نفسي و لا بلحق اتفرج
عالتلفزيون شوية و لا أعد عالنت ,,طول الليل رغي رغي رغي ,,و الله بتكلمني
بال4 ساعات لما وداني بتورم و مش بقولها غير آه و مممم
كيمو : ياعم كل البنات كدا ,,, في رابطة راس كدا ممكن تحط فيها الموبايل و تعيش عادي بايديك الاتنين و تعمل الي يعجبك و [ندعوك للتسجيل في المنتدى أو التعريف بنفسك لمعاينة هذا الرابط] ترغي هي
حامو : ماهي لما بترغي كتير و بسكت بتسألني أنا قولت ايه و مش بعرف أجاوبها و بتزعل
كيمو : طيب ما تجرب تحبها زي ما بتحبك
حامو : ياعم انت عبيط ,,احبها ليه يعني و اعلق نفسي بيها ,,زي ما بتعمل معايا أكيد هتلاقيها بتعمل مع عشرة غيري
كيمو : طيب خلاص علقها و سيبها دي حتى موزه يا عم
حامو : ما أنا عارف انها موزه ,,عشان كدا مش بستحمل أزعلها مني ,,بس بتخنق من الرغي التافهه
بص أنا بكره هقابلها و هكرها فيه
كيمو : طب كمل الماتش ,,هشيلك خمسه زي امبارح


اليوم التالي

حامو و نانسي في الكافيه
نانسي : ازيك عامل ايه
حامو : كويــــــــــــــــــــس
نانسي : و مالك بتمدها أوي كدا
حامو : عشان تبقى مختلفة عن كويس الي قولتهالك من خمس دقايق
نانسي : انت مالك يا حامو النهارده
حامو : زي الفل ,, أنا زي الفل ,,أهو زي القرد ,,أعملك شقلباز؟
نانسي : لأ انت مش طبيعي النهارده
حامو : ماشي

........

نانسي : هتفضل ساكت كدا كتير
حامو : خخخخخخخ تفو
نانسي : ايه الي عملته دا يا مجنون!!
حامو : عملت ايه!!؟
نانسي : حد يتف كدا في الكافيه!!
حامو : آه كان بلغم في زوري فتفيته
نانسي : يععععع انت مش اتيكيت خالص
حامو : اصل ابويا فلاح
نانسي : و ايه يعني ,,ما أنا جدي فلاح
حامو : أنا بحب العب في مناخيري على فكرة
نانسي : انت عبيط هههههه و في حد مش بيلعب في مناخيره اصلا
حامو : ايوه أنا عبيط يا ستي ,,الي قاعد أدامك دا عبيط
نانسي : حامو رايح فين !؟
حامو : جرسون ,,يا متر ,,يا قطر
المتر : اؤمرني يا بيه
حامو : شوف الحساب كام عشان ماشي
نانسي : احنا لحقنا نعد عشان نمشي!!
حامو : آه في معاد مهم ورايا
نانسي : معاد ايه دا ان شاء الله!
حامو : مهم ,,معاد مهم ,,طرشه!!
نانسي : و نزل عليك فجأة كدا المعاد دا
حامو : استغفر الله العظيم ,,آه نزل فجأة ,,الله ,,,خد يا متر الحساب و خلي الباقي ,,يلا يا عجرم و لا انتي قاعده هنا؟
نانسي : آه قاعده لسه شوية
حامو : يلا يا بنتي
نانسي : انت مش بتقول ماشي؟ ,, امشي انت أنا لسه قاعده شوية
حامو : طيب ,,يلا جود نايت

كيمو و حامو بعد سهرة
حامو : مش عارف يا كيمو و الله اول مره اسيب واحده و أحس بالذنب كدا
كيمو : انت عكيت جامد؟
حامو : جامد جامد جامد يعني
كيمو : طيب ما تكلمها و اعتذرلها
حامو : تفتكر هتقبل اعتذاري ؟
كيمو: ياعم مافيش اسهل من انك تضحك على قلب بنت ,,كلمتين حلوين و هتلاقيها شالت البوز ,,قولها معلش اصل كان في ظروف ,,مزاجي وحش في الشغل ,,اي حاجة
حامو : مش عارف و الله يا كيمو بس أنا لو رجعتلها يبقى هكمل معاها للآخر
كيمو : طب ما تكمل ,,انت مش بتحبها؟
حامو : مش عارف و الله ,,بس تقدر تقول آه متعلق بيها
كيمو : خلاص جرب ,,شوف حدد و قرر لو هتكمل معاها للآخر يبقى كلمها
حامو : ربنا يسهل

حامو يعود للبيت متأخرا
أم حامو : حتت دين عروسة ,,شهادة و اخلاق و زي القمر و الله
حامو : وحشة ,,
أم حامو : مش تعرف هي مين الأول!!
حامو : عارفها ,,بنت الدكتور كارم
أم حامو : و عرفت ازاي يا واد!!
حامو : ماهي أمها كانت هنا الصبح ,,كنت متوقع يعني انك تيجي تقوليلي كدا ,,بس اتاخرتي أوي على فكرة ,,استنيتك عالغدا و مش قولتيلي
أم حامو : يا واد بس شوفها الأول و أعد معاها يمكن تعجبك
حامو : يا ماما قولتلك لازم يكون في قبول
أم حامو : نفسي أفرح بيك يا واد و اشوفك عريس
حامو : قريب ان شاء الله يا ماما
أم حامو : يعني في واحده في دماغك
حامو : بإذن الله ,,انتي بس ادعيلي
أم حامو : و الله بدعيلك في كل صلاة يا ابني ربنا يرزقك ببنت الحلال
حامو : طيب أنا هروح اريح بقى

حامو يحاول الاتصال بنانسي بعد أن أغلق باب غرفته
حامو : ردي بقى ردي بقى ,,
نانسي : عايز ايه ؟
حامو : عايز ايه,,بطمن عليكي يا بت
نانسي : انت مش سبتني و مشيت
حامو : و الله كان عندي ظروف وحشة بس النهارده و كان مزاجي زفت ,,عارفه الواد كيمو
نانسي : ماله
حامو : أبوه مات النهارده
نانسي : مات !!
حامو : قلبه وقف
نانسي : و الله قلبه وقف
حامو : بصي انتي ممكن مش تصدقيني ,,بس بجد أنا مش حبيت اقولك عشان ما تبقاش صدمة عليكي
نانسي : البقاء لله
حامو : أنا ما رضتش أنام و انتي زعلانه مني ,,و ندمان على الي عملته معاكي
نانسي : انت خليت منظري زفت
حامو : هعوضهالك و الله ,,بصي مش هرغي كتير ,,بكره الساعة 6 في الكافيه اياه ,,هعملك مفاجئة


الساعة السادسة و النص

في الكافيه
حامو : ردي بقى ردي بقى ,,فينك بس
حامو يبتسم بعد أن رأى نانسي و هي قادمة
نانسي : افندم
حامو : افندم !! ,,أعد يا باشا
نانسي : قاعدت أهو و بعدين
حامو : غمضي عنيكي
نانسي : أغمض ايه انت كمان
حامو : غمضي يا بت و بلاش لماضة
نانسي : أدينا غمضنا
حامو : فتحيها بقى
نانسي : ايه دا ,,مين ,,حامو أدامي ,,ما تنجز يلا بقى في الليلة دي
حامو : ما تبصي عالترابيزة يا عبيطة
نانسي : ايه دا! ,,واااااااو
دا الماظ ,,دي غالية جدا
حامو : ما تغلاش عليكي يا جميل
نانسي : مرسي أوي يا حامو
حامو : لسه زعلانه مني ؟
نانسي : لأ طبعا ,, مرسي بجد يا حامو

دي أغلى هدية جتلي في حياتي
حامو : دا احنا عشانك نجبلك الدنيا كلها
نانسي : دا أنا بموت فيك
حامو : و أنا كمان


بعد اسبوعين

حامو و كيمو في محل البلايستيشن
كيمو : أخبارك ايه مع نانسي
حامو : كويسين
كيمو : لسه بتتصل بيك كتير
حامو : لا أنا الي باقيت بتصل ,,بس
كيمو : بس ايه ,,انت كاتم في قلبك ,,صاحبك و حافظك قول
حامو : مش عارف يا كيمو ,,بس من ساعة ما صالحتها من اسبوعين و هي ماباقيتش نانسي بتاعت زمان
كيمو : ازاي؟
حامو : يعني الأول كانت بتتصل عليه كتير و بتكلمني دايما ,,كنت حاسس باهتمام منها ,,دلوقتي
من ساعت ما اعترفتلها بحبي ماكنتش أنا أتصل هي ما تعبرنيش ,,و بحس انها
مخنوقة مني كدا ,,غير لما كنت تقلان عليها و انت عارف أنا ماليش في تكميل العلاقة ,,بتاع صياعة بس هههه ,,هو صحيح بعد ما بتقول بحبك و هي تقولك بحبك ايه تاني بيتقال؟
كيمو : هههههه ,,اديها مفاجئات ,,البنت تحب الديك شعره منفوش على طول
فاجئها باي حاجه
حامو : بحاول و الله ,, بس مش عارف يا كيمو ,, الواحد مش بيعرف ينام و باله مشغول على طول و حكاية اني مش في بالها دي مجنناني
كيمو : دا انت باقيت متعلقة بيها جامد
حامو : جدا
كيمو : بص مش هي بتحبك ؟
حامو : آه بتقول كدا كلام
كيمو : بس خلاص ,,ما تقلقش ,,انت بس فاجئها دايما عشان تنبهر بيك
حامو : أنا عايز أخطبها اساسا
كيمو : كدا صح ,, و حتى هتبقى بتاعتك رسمي
حامو : بس خايف من موضوع تجاهلها دا
كيمو : لا ما تخافش و بكره تقول كيمو ال

اليوم التالي

حامو و نانسي في الكافيه
نانسي : هفففف زهقانه موت
حامو : تعالي أحكيلك عن سهرة امبارح كانت جامده طحن
نانسي : لأ مش عايزه
حامو : ليه دا حتى حصل حتت موقف
نانسي : يا أخي مش عايزه هو بالعافية!! ,,ما بتفهمش قولتلك لأ
حامو : انتي في ايه مالك يا نانسي
نانسي : يا ربي منك ,,مماليش
حامو : حاسك كدا بقالك فترة مش طايقاني
نانسي : بس مخنوقة شوية ,,و بصراحة كدا انت باقيت ممل
حامو : أنا ممل يا نانسي؟
نانسي : استغفر الله العظيم يا رب ,,انت بتسألني سؤال جاوبته قبل ما تسأله ,,آه ممل
موبايل نانسي يرن
نانسي : ايوه ,,طيب هكلمك بعد شوية ,,سلام
حامو : دا تالت واحد تقوليله هكلمك بعد شوية
نانسي : و دي فيها حاجه؟
حامو : هو مين إلي بيكلمك ؟
نانسي : هيما ,,معانا في الدفعة تعرفه؟
حامو : لأ ,,بس بيكلمك ليه
نانسي : و انت مالك يا أخي واحد زميلي و بيكلمني
حامو : طيب و انا مثلا كيس جوافة بالنسبالك و لا سيد قشطه معاكي
نانسي : انت هتعملي فيها جوزي ,,انت زيك زي غيرك على فكرة
حامو : زي غيري!!
موبايل نانسي يرن ,, حامو يلتقط هاتفها سريعا
حامو : الو ,,الو ,,ما ترد
نانسي : ايه الي عملته دا!! ,,هات موبايلي
حامو يفتح رسائلها
حامو : كل دول بتكلميهم ,,واحد اتنين ,,تلاته ,,قابلني عند الاستاد ,,
نانسي : انت انسان واطي وحقير,,هات موبايلي يا حرامي
المتر : لو سمحت يا استاذ صوتكم عال
حامو : و انت مالك انت كمان!!
نانسي تسحب موبايلها و تركض باكية
حامو : نانسي ,,نانسي ,,,
و أخيرا ,,ضحك حامو ضحكة ساخرة : سيبها تحبك |تحبهاتسيبك

رائع ما قدمت
\
/
يسلمووو الايادي
\
/
دمت بود
\
/
تحية من القلب
/
\
مع وردة معطرة